Gabaygan oo la magac baxay Xunbo, waxan ka qorray Mukhtaar Xamuurad ,wuxuna noo sheegay inuu gabaygani yahay gabaygii ugu danbeeyey ee uu tiriyey Alla ha u naxariistee Maxamed Cabdi Aar. Abwaanku wuxu inoo sawirayaa waayaha aduun iyo sida ay tiiraanyo u leedahay qof ku dhex nool bulsho aan qadarineyn . Wuxu kale oo humaaggiisa  inagu tusayaa xaaladda Soomaaliya iyo sida ay u  cakiran tahay . wuxuna yidhi :-

Waa xoodh gudhaayoo aduun waa xunboo kale e

Waa xayska da’ayoo kaloo ma laha xeeldheere

Xiiso ma laha soomaali aad xeer la dhigataaye

Goortay xumaan kugu arkaan kaa xariir jabe e

Xurmo iyo wanaag waa intaad xoogga leedahaye

Xoola siiyayaa iyo si kale u xusul duubaaba

Anba maalintaa kii xanniban waan xurmayn jiraye

Xigto iyo xigaaliyo dhammaan xididka ii gooyey

Nin waliba wuxuu igu xusaan berri ku xaalayne

Waxay aniga iga xaasidaan waa xujiyo yaabe !!!!

Naftaa xeriyey, oontaan xarrimay nolosha aaan xooray

Taftaan xaydey, xusulkaan kabaha xag ugu laad-laadshey

Dhulkaan xaarey, ciiddaan xardhiyo dhagaxa aan xuunshey

Xidig baygu yuururey tan iyo xulaygii dayreede

Hayeeshee xilligu ways bedeli xoobirada dhow eh

Xaaladayda eebbaan ku xidhay waw xamdiyayaaye.

Gabaygii Tusaale halka ka akhri

Mohamed abdi aar alaha u naxariistee waxaa uu tixdaan kaga jawaabay mar uu aadan tarabi soo tiriyey gabay uu lahaa (cabdiyoow tukihi weli taaladii waa ka taaganyahay),cadigu waa cadi qays. aadan tarabi markaa jabuuti ayuu  joogey waxa uuna gabayga u diray rag xamar jooga oo abwaano ah ayna ka mid yihiin hadraawi,cabdiqays oo uu ku halqabsanayey,siciid saalax,gaariye iyo  niman kale oo xamar ku sugan. maxamed cabdi aar oo ceerigaabo jooga ayna aadan tarabi saaxiib ahaayeen maansooyinkana weligood isku tuur tuuri jireen
ayaa hawada ka laacay wuxuna yidhi.

tirshoow aadan taraboow
toobiyaha sanaag
todobaadka wiilkii
tebeshlaha ku joogoow

tixdii aad direysee
cabdi aad u tebisaan
hawa dhexe ka taabee
sheekada tilmaantuna
tii aad lahaydeen
tiinii in ay tahay
anba waan tebayee
taydana ku talo gala

xuunshaduba tuuraha
dhaaxeey ka talisee
hddii uu tukaa haad
markiisii tisqaadoo
isku taagey taalada
tiir biraa u aasano
sida looga tuuraa
waa calaacal timolee
ninna yaanu taa tebin

taariikhda dib u raac
wakhtigii tamuud iyo
illaa maanta taagnayd
oo taynu joognaa
todobaatankii tahay

imisaa wan taharweyn
tunka hilibku buuxsamey
ama tuur cadoow dibi
baarqab geela toocsada
immisaa talcuuntiyo
cudurada tamootidu
tarab tarab u laayeen

immisaa nin taajira
taajku waajo saarnaa
tuugsanaaya maantaba
tiiraanjo ciilqaba

immisaa nin taagdaran
tukubaayey shalay galab
taabba qaaday la’arkaa
taabacaaya maantaba

todobaa idaa dhalay
todobaatan baa madhan
tiriyoo wixii hadhay
ceelkii tigaadliyo
todob da ay haloo raro

addna waa tilmaamaha
anna waa tusaalaha
tii allena halkeedii.